Malayziyada yol qəzasında 10 nəfər ölüb

Malayziyanın Selanqor ştatında magistral yolda bir neçə avtomobilin iştirakı ilə baş verən yol qəzasında 8-i uşaq olmaqla 10 nəfər ölüb.

“Report” TASS-a istinadən xəbər verir ki, qəza zamanı üç minik avtomobili ilə yarımqoşqulu yük maşını toqquşub. 

Ştatın Yanğından Xilasetmə İdarəsinin rəisi Norazam Xamisin sözlərinə görə, ölən 10 nəfərin biri kişi, biri qadın, digər səkkizi uşaqdır. Hadisə nəticəsində daha yeddi nəfər müxtəlif dərəcəli xəsarətlər alıb.

Xilasedicilər qoşqunu əzilmiş avtomobilin üzərindən qaldırmaq və yaralıları çıxarmaq üçün krandan istifadə etməli olublar.