Livan qoşunları İsraillə razılaşma çərçivəsində ölkənin bəzi rayonlarında yerləşməyə başlayıb

ABŞ-nin vasitəçiliyi ilə əldə olunmuş razılaşma çərçivəsində İsrail qoşunlarının cənubdakı Zautar-əl-Qarbiya şəhərindən çıxarılmasından sonra Livan ordusunun hərbçiləri bu bölgədə yerləşməyə başlayıblar.

"Report" xəbər verir ki, bu barədə "Al Jazeera" telekanalı məlumat yayıb.

"Quru qoşunlarının komandanlığı bir daha vətəndaşları təhlükəsizlik vəziyyəti sabitləşənə qədər şəhərə getməməyə və göstərişlərə əməl etməyə çağırır", - Livan ordusunun bəyanatında bildirilib.

Daha əvvəl ABŞ Dövlət Departamentindən bildirilib ki, Zautar-əl-Qarbiya ABŞ-nin vasitəçiliyi ilə əldə olunmuş razılaşmanın icrasının sınaqdan keçirilməsi planlaşdırılan üç cənub rayonundan biridir.

Razılaşmaya əsasən, İsrail hərbçiləri Livanın cənubunda tutduqları mövqelərdən qüvvələrini mərhələli şəkildə çıxaracaqlar. Bundan sonra Livan ordusu təhlükəsizliyin təmin edilməsini öz üzərinə götürəcək və "Hizbullah"ın tərk-silah edilməsi prosesinə nəzarət edəcək.

Digər iki yaşayış məntəqəsi Frun və Srifadır.