La-Manşa miqrantları xilas etmək üçün gəmilər göndəriləcək

Avropa Sərhəd və Sahil Mühafizəsi Agentliyi ("Frontex") davam edən miqrasiya böhranı fonunda axtarış-xilasetmə əməliyyatlarında iştirak etmək üçün La-Manş və Şimal dənizinə patrul gəmiləri göndərəcək.

"Report" "Reuters" agentliyinə istinadən xəbər verir ki, bu barədə Fransa hakimiyyətinin nümayəndələri bildiriblər.

Məlumata görə, "Frontex" sentyabr-oktyabr aylarında bölgəyə iki İspaniya patrul kateri göndərəcək. Daha sonra yanvar ayınadək əməliyyata Litvadan daha bir kater qoşulacaq. Gəmilər Fransa qüvvələri ilə birlikdə patrul xidmətində iştirak edəcəklər.

Agentlik qeyd edib ki, La-Manş dünyanın ən sıx gəmi marşrutlarından biridir. Miqrantlar mütəmadi olaraq insan alveri ilə məşğul olanlar tərəfindən verilən kiçik və çox vaxt həddindən artıq yüklənmiş qayıqlarla Fransadan Böyük Britaniyaya keçməyə cəhd edirlər. Güclü cərəyanlar və çətin gəmiçilik şəraiti səbəbindən belə cəhdlər dəfələrlə insanların ölümü ilə nəticələnib.

Avqust ayında Fransa sahil mühafizəsi La-Manşda yanan miqrant gəmisindən 157 nəfəri xilas edib.

"Frontex"in əlavə qüvvələr göndərmək qərarı, Fransa və Böyük Britaniya liderlərinin La-Manş vasitəsilə qeyri-qanuni miqrasiya ilə mübarizə tədbirlərini müzakirə etdikləri görüşdən bir neçə gün sonra qəbul edilib.