İtaliya XİN: Aİ ABŞ mallarına 21 milyard avro məbləğində rüsum tətbiq edə bilər

Avropa İttifaqı (Aİ) Brüssel və Vaşinqton arasında razılaşma əldə edilməyəcəyi təqdirdə ABŞ mallarına 21 milyard avro məbləğində rüsum tətbiq etməyə hazırdır.

"Report"un TASS-a istinadən verdiyi məlumata görə, bu barədə İtaliyanın xarici işlər naziri və baş nazirin müavini Antonio Tayani bildirib.

"Böyük Britaniyanın etdiyi kimi prinsipial razılaşmaya nail olmaq və növbəti aylarda ayrı-ayrı ticarət bölmələri üzrə texniki danışıqlara başlamaq mümkündür", - o, “Il Messaggero” qəzetinə müsahibəsində bildirib.

A.Tayani əlavə edib ki, əgər razılaşma əldə olunmasa, Aİ ABŞ mallarına 21 milyard avro məbləğində rüsum tətbiq etməyə hazırdır: "Mən əminəm ki, irəliləyiş əldə olunacaq. Rüsumlardan hər kəs əziyyət çəkir. Gələcək üçün hədəfimiz sıfır tariflər, Kanada, ABŞ, Meksika və Avropa arasında açıq bazardır".