İsveçdə sosial şəbəkələrdəki təhdidlərə görə 20-dən çox məktəb bağlanıb

İsveçin Burlinqe bələdiyyəsində mümkün zorakılıq təhdidləri səbəbindən 20-dən çox məktəb müvəqqəti olaraq bağlanıb.

"Report" "Aftonbladet"ə istinadən xəbər verir ki, naməlum şəxs sosial şəbəkələrdə məktəblərin birində atışma törədəcəyi ilə hədələyib.

"Biz proaktiv hərəkət etmək qərarına gəldik. Vəzifəmiz şagirdlər və əməkdaşlar üçün təhlükəsiz mühiti təmin etməkdir. Vəziyyətə aydınlıq gətirilməsini gözlədiyimiz müddətdə bir sıra məktəblər bağlı qalacaq", - region rəhbəri Yorgen Olsson bildirib.

Məhdudlaşdırıcı tədbirlərə məktəbəqədər müəssisələr, ibtidai, orta və özəl məktəblər, eləcə də böyüklər üçün tədris proqramları şamil edilib.