İspaniyada qapalı məkanlarda maska ​​rejimi yumşaldılacaq

İspaniya hökuməti bu gün ölkədə pandemiya ilə əlaqədar tətbiq edilən maska ​​rejiminin aprelin 20-dən əhəmiyyətli dərəcədə yumşaldılacağı qərarını təsdiqləyib.

“Report” TASS-a istinadən xəbər verir ki, bu barədə Nazirlər Kabinetinin tviter səhifəsində məlumat yerləşdirilib.

İndiyə qədər krallıq sakinlərindən bütün ictimai yerlərdə, o cümlədən mağazalar, kafelər, restoranlar və ya məktəblər kimi qapalı yerlərdə maska ​​taxmaq tələb olunurdu. Ölkədə sərt maska rejimi təxminən iki il əvvəldən tətbiq edilir.

Çərşənbə günündən etibarən maska taxılması xəstəxanalarda, qocalar evlərində, eləcə də ictimai nəqliyyatda məcburi olacaq.