İşdən çıxarılan USAID əməkdaşları Vaşinqtonda etiraz aksiyası keçiriblər

ABŞ Beynəlxalq İnkişaf Agentliyinin (USAID) işdən çıxarılan əməkdaşları və HİV/AİDS-ə qarşı mübarizə aparan fəallar Vaşinqtondakı Kapitoli binasında etiraz aksiyası keçiriblər.

"Report" xəbər verir ki, bu barədə "The Guardian" məlumat yayıb.

Etiraz aksiyası Tramp administrasiyasının USAID-in ölkə və xaricdəki əməkdaşlarının demək olar ki, hamısının ödənişli məzuniyyətə göndərilməsi qərarı fonunda təşkil edilib.

Hüquq-mühafizə orqanlarının məlumatına görə, nümayişin dayandırılması tələblərini pozan 20-yə yaxın şəxs saxlanılıb. Etirazçılar "Konqres məsuliyyət daşıyır – yardımı dərhal bərpa edin!" şüarları səsləndirərək qanunvericiləri HİV-lə mübarizə üçün xarici yardımın maliyyələşdirilməsinin bərpası istiqamətində təcili tədbirlər görməyə çağırıblar.