İordaniyada kilsədə törədilən terror aktı qurbanlarının sayı artıb - Yenilənib

İordaniyanın Əl-Kərək vilayətində pravoslav kilsəsinə edilmiş silahlı hücum nəticəsində azı doqquz nəfər həlak olub.

"Report" xəbər verir ki, yenilənmiş məlumatları İordaniya Səhiyyə Nazirliyi açıqlayıb.

"Həmmud rayonundakı "Müqəddəs Georgi" məbədində baş verən terror aktının qurbanlarının sayı 8-dən 9 nəfərə çatıb", - qurumun məlumatında bildirilir.

Daha əvvəl səhiyyə naziri İbrahim əl-Bəddur xəstəxanalarda daha 27 yaralının qaldığını qeyd edib. Onun sözlərinə görə, səkkiz yaralı şahzadə Əli bin Hüseyn adına hərbi hospitala köçürülüb. "Həkimlər onlardan ikisinin vəziyyətini kritik olaraq qiymətləndirirlər", - nazir bildirib.

13:28

İordaniyada cümə günü Əl-Kərək əyalətindəki kilsə yaxınlığında dəfn mərasimi zamanı terrorçuların hücumu nəticəsində ölənlərin sayı 8 nəfərə çatıb.

"Report" xəbər verir ki, bu barədə "Al Mamlaka" telekanalı məlumat yayıb.

Həmçinin 27 nəfərin yaralandığı bildirilir.

Zərərçəkənlərdən ikisi hələ də reanimasiya şöbəsində kritik vəziyyətdədir və süni tənəffüs aparatına qoşulub, orta və yüngül xəsarət alan daha 6 nəfər isə cərrahiyyə şöbələrində müalicə alır.

Ölkənin xüsusi xidmət orqanları kilsəyə hücum edənləri axtarır. Əmman və digər şəhərlərdə təhlükəsizlik tədbirləri gücləndirilib.