Hipper: Aİ Rusiyanın təhdidlərindən sonra nümayəndəliyini Kiyevdən təxliyə etmək niyyətində deyil

Avropa İttifaqı (Aİ) Rusiyanın təhdidlərindən və Qərb ölkələrinin Ukrayna paytaxtında mövcudluğunun azaldılması ilə bağlı çağırışlardan sonra diplomatik və mülki missiyalarını Kiyevdən çıxarmağı planlaşdırmır.

"Report"un Avropa bürosunun məlumatına görə, bunu Aİ-nin Xarici İşlər Xidmətinin nümayəndəsi Anita Hipper Brüsseldə keçirilən brifinqdə bəyan edib.

Onun sözlərinə görə, Brüssel Moskvanın bəyanatlarını təzyiqi gücləndirmək və Ukrayna ətrafında qorxu atmosferi yaratmaq cəhdi kimi qiymətləndirir.

"Rusiya bu cür təhdidlərlə panika yaratmağa çalışır. Onlar Ukraynanın qorxuya düşməsini və təcrid olunmasını istəyirlər, lakin bu baş tutmayacaq. Aİ Kiyevdə fəaliyyətini davam etdirir", - Hipper bəyan edib.

Hipper qeyd edib ki, Ukrayna paytaxtına və digər şəhərlərə hücumlar ölkənin mülki əhalisi üçün "gündəlik reallıq" olaraq qalır. Onun sözlərinə görə, yerlərdəki Avropa nümayəndə heyəti və Aİ-nin mülki missiyasının nümayəndələri də əvvəllər zərbələrə məruz qalıb.

"Mülki şəxslərə və qeyri-hərbi obyektlərə qarşı qəsdən edilən hücumlar müharibə cinayətləridir. Beynəlxalq humanitar hüququn bu cür pozulmasına görə bütün komandirlər, icraçılar və onların şərikləri məsuliyyətə cəlb olunacaqlar", - o deyib.

Avropa Komissiyasının mətbuat xidmətinin rəhbəri Paula Pinyonun sözlərinə görə, Rusiyanın müvəqqəti işlər vəkili son hücumlardan sonra Aİ-nin mövqeyini çatdırmaq üçün Avropa strukturlarına çağırılıb.

Brüsseldə bəyan ediblər ki, baş verənlər Moskvanın sülh yolu ilə həlldə maraqlı olmamasını təsdiqləyir və Ukraynaya hava hücumundan müdafiə sistemlərinin tədarükü və maliyyə yardımı da daxil olmaqla daha geniş dəstək göstərilməsinin xeyrinə arqumentləri gücləndirir.

Pinyo, həmçinin bildirib ki, danışıqlarda Ukrayna nümayəndə heyətinin rəhbəri və Ukrayna Milli Təhlükəsizlik və Müdafiə Şurasının katibi Rustem Umerov ötən gün Brüsseldə Avropa Komissiyasının sədri Ursula fon der Lyayenin kabinet rəhbəri Byörn Zaybertlə görüşüb.

"Bu, Ukrayna tərəfi ilə daimi əlaqələrimizin bir hissəsidir. Xüsusilə son hadisələr və həftə sonunda baş vermiş hücumlar fonunda müdafiə əməkdaşlığı əsas müzakirə mövzusu olub", - Pinyo qeyd edib.