Ekvadorda torpaq sürüşməsi nəticəsində ölənlərin sayı 50-yə çatıb, onlarla insan itkin düşüb

Martın sonunda Ekvadorun mərkəzindəki Alausi şəhərində baş vermiş torpaq sürüşməsi nəticəsində azı 50 nəfər həlak olub.

“Report” xəbər verir ki, bu barədə “TeleSUR” telekanalı ölkənin Baş Prokurorluğuna istinadən məlumat yayıb.

Məlumata görə, həlak olanların meyitlərinin axtarışı davam edir.

Daha 38 nəfərin itkin düşdüyü bildirilir. Hazırda azı 57 ev dağıntılar altındadır.

Hadisə martın 27-nə keçən gecə baş verib. Təbii fəlakət zonasında ümumilikdə 500-dən çox insan olub. Beynəlxalq Qırmızı Xaç Komitəsi 163 evin dağıldığını və ya zədələndiyini təxmin edib.

Fevral ayında ölkənin Fövqəladə Hallar İdarəsi Alausi bölgəsində süxurların yerdəyişməsi və yerdəyişməsi riskinin olduğu barədə xəbərdarlıq etmişdi.