Əfqanıstanda “Taliban”ın min üzvü həbsdən buraxılıb

Əfqanıstan hakimiyyəti indiyədək “Taliban” hərəkatının min üzvünü həbsdən azad edib.

“Report” “RİA Novosti”yə istinadən xəbər verir ki, Əfqanıstanın Milli Təhlükəsizlik Şurası bu barədə açıqlama yayıb.

“COVID-19-a qarşı mübarizə tədbirləri çərçivəsində Əfqanıstan hakimiyyəti “Taliban”ın 1 000 üzvünü sərbəst buraxıb. Bundan sonra “Taliban” Əfqanıstan Müdafiə və Təhlükəsizlik Qüvvələrinin hərbçilərinin sərbəst buraxılmasını sürətləndirməli, zorakılıq tətbiqini dayandırmalı, hakimiyyətlə birbaşa danışıqlara başlamağa hazırlaşmalıdır”, - deyə Şura bildirib.

“Taliban”ın Qətərdəki siyasi idarəsinin nümayəndəsi Süheyl Şahin əsirlikdə saxladıqları Əfqanıstanın 48 hərbçisini sərbəst buraxdıqlarını deyib.

Qeyd edək ki, taliblər Əfqanıstan hakimiyyətindən ABŞ-la əldə olunan razılaşmaya əsasən, 5 min əsirin sərbəst buraxılmasını istəyir. Əfqanıstan hakimiyyəti isə 1,5 min məhbusun tədricən sərbəst buraxılacağına razılıq verib.

Xatırladaq ki, cari ilin fevral ayında Qətərdə ABŞ-la “Taliban” 18 ildən sonra ilk dəfə sülh haqqında razılıq imzalayıb. Həmin razılaşmada 14 ay ərzində xarici qoşunların Əfqanıstandan çıxarılması, əsirlərin mübadiləsindən sonra hakimiyyətlə danışıqlara başlanması nəzərdə tutulub.