Əfqanıstanda daşqınlar onlarla insanın həyatına son qoyub

Əfqanıstanda leysan yağışlar üç əyalətdə daşqınlara səbəb olub, azı 21 nəfər təbii fəlakətin qurbanı olub.

Bu barədə “Report” “Sinxua” agentliyinə istinadən xəbər verir.

Güclü yağışlar ölkənin şərq və mərkəzi bölgələrində yerləşən Lohar, Vardak və Host əyalətlərinin bir çox kənd və qəsəbələrinə ziyan vurub.

Ölənlər arasında qadınlar və uşaqlar da var. Qeyd edilir ki, xeyli sayda insan müxtəlif dərəcəli xəsarətlər alıb.

Bundan əlavə, təbii fəlakət yüzlərlə yaşayış binasını dağıdıb, böyük əkin sahələrini və onlarla meyvə bağını məhv edib.