Ceffri Tsanq WUF13-də: Süni intellekt şəhərlərin idarə edilməsində mütəxəssislərə kömək edəcək

Süni intellekt (AI) mütəxəssisləri əvəz etmir, şəhər sistemlərinin idarə edilməsində onların işini gücləndirən alətə çevrilir.

"Report"un məlumatına görə, bunu "Earthasia INSIGHT"ın data-sayentisti Ceffri Tsanq (Jeffrey Tsang) Bakıda WUF13 çərçivəsində keçirilən tədbirdə bəyan edib.

O, şəhər yaşıllıq sahələrinin idarə edilməsində süni intellektin tətbiqinə yanaşmanı təqdim edərək qeyd etdi ki, texnologiyalar arboristlərin və şəhər xidmətlərinin iş səmərəliliyini əhəmiyyətli dərəcədə artıra bilər.

"Süni intellektin köməyi ilə mütəxəssislərin yerində çəkdiyi fotoşəkillər ağacın vəziyyətini müəyyən etmək, zədələri aşkar etmək və riskləri qiymətləndirmək üçün avtomatik təhlil edilə bilər", - o deyib.

İkinci istiqamət olaraq o, ağaclar haqqında məlumatların rəqəmsallaşdırılmasını və formaların emalının avtomatlaşdırılmasını göstərdi: "OCR və süni intellekt texnologiyalarının istifadəsi dağınıq məlumatları strukturlaşdırılmış rəqəmsal verilənlərə çevirməyə və qərarların qəbulu üçün vahid hesabatlar formalaşdırmağa imkan verir".

Sistemin üçüncü elementi kimi o, şəhər ağaclarının vəziyyətini xəritədə əks etdirən, risk səviyyəsi, qulluq tövsiyələri və proqnoz modellərini özündə birləşdirən inteqrasiya olunmuş rəqəmsal panellərin yaradılmasını qeyd edib.

Bununla yanaşı o vurğulayıb ki, süni intellekt insanı əvəz edən deyil, dəstək aləti kimi çıxış edir, yekun qərarlar isə əvvəlki kimi mütəxəssislərin ixtiyarında qalır.