ABŞ və İslandiya müdafiə əməkdaşlığının 75 illiyi münasibətilə təlimlər keçirəcək

NATO ölkələri 22 avqust - 3 sentyabrda İslandiyada keçiriləcək "Northern Viking 2026" təlimində iştirak edəcəklər.

"Report"un məlumatına görə, bu barədə ABŞ-nin Müharibə Nazirliyinin saytında dərc olunmuş açıqlamada bildirilib.

Məlumata görə, dünən ABŞ hərbi qulluqçuları ölkənin Hərbi Dəniz Qüvvələrinin 6-cı Donanması tərəfindən keçirilən təlimdə Keblavikdə İslandiya Sahil Mühafizəsi və digər NATO müttəfiqləri ilə birlikdə iştirak ediblər.

Təlimdə Belçika, Danimarka, Fransa, İslandiya, Norveç, Polşa və ABŞ, eləcə də Norfolkdakı NATO xüsusi təyinatlı qüvvələrinin şəxsi heyəti iştirak edəcək.

"Northern Viking 2026" təlimi İslandiya və ABŞ arasında 1951-ci il tarixli ikitərəfli müdafiə müqaviləsinin 75-ci ildönümünə təsadüf edir.

Təlimlərin əsas sahələri sualtı qayıqlara qarşı müharibə, mina əleyhinə tədbirlər, axtarış və xilasetmə, humanitar tibbi müdaxilə və təbii fəlakətlərin fəsadlarının aradan qaldırılmasına yönələcək.