ABŞ-ın yeni hakimiyyətinin bəzi nazirləri məlum oldu

Yerli mətbuatın yazdığına əsasən ABŞ-da keçirilən prezident seçkilərində qalib gəlmiş Co Bayden Uilminqtonda özünün gələcək administrasiyasının nazir vəzifələrinə namizədləri təqdim edib.

“Report” xarici mətbuata istinadən xəbər verir ki, Bayden təqdim edilən bütün şəxslərin təcrübəyə və "yeni, cəsarətli düşüncəyə" malik olduqlarını deyib.

Bayden ABŞ-ın Kənd Təsərrüfatı Nazirliyinin başçısı postuna Tom Vilsakın adını açıqlayıb. O, Ayova ştatının qubernatoru vəzifəsini tutub, eyni zamanda Barak Obama administrasiyasında Kənd Təsərrüfatı Nazirliyinin başçısı olub.

İnşaat və şəhər inkişafı naziri vəzifəsinə namizəd Ohayo ştatından Nümayəndələr Palatasının üzvü Marş Faj olub. Senat tərəfindən vəzifəyə təsdiqlənəcəyi təqdirdə o, ölkə tarixində bu vəzifədə ikinci afroamerikalı olacaq. Faj ABŞ Konqresinin Nümayəndələr Palatasının mənzil, kənd təsərrüfatı, təhsil və məşğulluq məsələləri ilə məşğul olan komitələrinin üzvüdür.

Bayden veteranların işləri üzrə nazir vəzifəsinə daha əvvəl Obama administrasiyasında Ağ Evin əməkdaşları aparatının rəhbəri olmuş Denis Makdonounun namizədliyini irəli sürüb. Ağ Ev yanında daxili siyasət görə şuranın başçısı isə Syuzan Rays olacaq. Çin üzrə mütəxəssis Ketrin Tey ABŞ-ın ticarət danışıqlarında nümayəndəsinin postuna namizəd irəli sürülüb.

"Namizədlərdən bəziləri məşhur şəxsiyyətlərdir, bəziləri ilk dəfə əhəmiyyətli vəzifələr tutacaqlar”, - Bayden qeyd edib.