ABŞ-da ailə münaqişəsi 8 nəfərin ölümü ilə nəticələnib

ABŞ-ın Montana ştatında atışma və ardınca baş verən yanğın nəticəsində dördü uşaq olmaqla səkkiz nəfər həyatını itirib.

"Report"un məlumatına görə, bu barədə ABC News polisə istinadən xəbər verib.

Hadisə avqustun 23-də Billinqs şəhərində yerləşən fərdi yaşayış evində baş verib. Atışma barədə məlumat daxil olduqdan sonra polis hadisə yerinə gəlib. Lakin həmin vaxt ev artıq alov içində olub.

Hüquq-mühafizə orqanlarının əməkdaşları evin arxa həyətində odlu silahdan yaralanmış şübhəli şəxsi aşkar ediblər. İstintaqın ilkin versiyasına görə, kişi özünə atəş açıb. O, saxlanılaraq xəstəxanaya çatdırılıb, lakin sonradan aldığı xəsarətlərdən dünyasını dəyişib.

Yellouston dairəsinin şerifinin sözlərinə görə, faciə ailə münaqişəsi ilə başlayıb.