Anar Quliyev: Azərbaycanın 7 şəhərinin baş planı təsdiqlənmə mərhələsindədir

Azərbaycanın 7 şəhərinin baş planı təsdiqləmə mərhələsindədir.

"Report" xəbər verir ki, bunu Dövlət Şəhərsalma və Arxitektura Komitəsinin sədri Anar Quliyev Ümumdünya Şəhərsalma Forumunun 13-cü sessiyası (WUF13) çərçivəsində Türk Dövlətləri Təşkilatının Yüksək Səviyyəli Şəhər Dialoqunda deyib.

Onun sözlərinə görə, 2018-ci ildən bəri məkan planlaşdırılması sistemi yenidən qurulub:

"Ölkə daxilindəki şəhərlər indi mütəmadi olaraq yenilənən 20 illik baş planlarla idarə olunur. Bu gün 79 şəhərimizdən 65-i bu planlarla əhatə olunub, daha 7 şəhərin planı isə təsdiqləmə mərhələsindədir. Həmçinin 2230-a yaxın qəsəbə və kənd üçün ətraflı planlaşdırma başa çatdırılıb".

Komitə sədri qeyd edib ki, Azərbaycanın flaqman layihəsi olan "Bakı 2040 Baş Planı" paytaxtı polisentrik, insan mərkəzli və ekoloji cəhətdən məsuliyyətli bir böyümə modelinə doğru aparır ki, burada yaşayış sahələri, iş yerləri, xidmətlər və ictimai məkanlar bir-birinə daha yaxın olur.

"Biz mənzilə bir əmtəə kimi deyil, sosial sabitliyin və inklüziv böyümənin təməli kimi yanaşırıq", - o vurğulayıb.

A.Quliyev əlavə edib ki, ölkədə Dövlət Mənzil İnşaatı Agentliyi (MİDA) və İpoteka və Kredit Zəmanət Fondu vasitəsilə bazar qiymətindən aşağı, müasir, enerji səmərəli evlər təqdim edilir:

"Bu, bazar dərəcələrindən xeyli aşağı olan uzunmüddətli güzəştli kreditlərlə dəstəklənir. 55 000-dən çox ailə bu maliyyələşmədən yararlanıb və onların təxminən 70 faizi gənclərdir. ​Regionumuz üçün bəlkə də ən mühüm təcrübə Qarabağ və Şərqi Zəngəzurun yenidən qurulmasıdır. Onilliklər boyu davam edən işğal, dağıntı və köçkünlükdən sonra biz "daha yaxşısını inşa etmək" prinsipi ilə yenidən qururuq, sadəcə, itirilənləri bərpa etmirik, bütöv şəhər və kəndləri "ağıllı şəhər", "ağıllı kənd" prinsipləri, yaşıl enerji və insan mərkəzli dizayn əsasında yenidən planlaşdırırıq".