Macarıstan Azərbaycana avtobus istehsalında əməkdaşlıq təklif edir

Azərbaycanla Macarıstan arasında bir sıra sahələrdə geniş əməkdaşlıq var və bu tərəfdaşlıq əlaqələri avtobus istehsalında da ola bilər.

"Report" xəbər verir ki, bunu Macarıstanın İqtisadiyyat Nazirliyinin nümayəndəsi Gergely Fabian Bakıda keçirilən Azərbaycan-Macarıstan Hökumətlərarası Komissiyasının 10-cu iclasında deyib.

Onun sözlərinə görə, ikitərəfli əlaqələr inkişaf edir: "Biz bu münasibətləri daha da dərinləşdirmək əzmindəyik".

"BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) Azərbaycanda keçirilməsi böyük nailiyyətdir. Bu münasibətlə Azərbaycanı təbrik edirəm", - deyə G. Fabian qeyd edib.

Azərbaycanın əmək və əhalinin sosial müdafiəsi naziri Sahil Babayev vurğulayıb ki, Azərbaycanla Macarıstan arasında avtobusla bağlı layihənin yaxın dövrdə icrasına başlanılacaq.