Dövlət Gömrük Komitəsinin sədri Kürdəmirdə vətəndaşları qəbul edib

Bakı. 30 oktyabr. REPORT.AZ/ Bu gün Dövlət Gömrük Komitəsinin (DGK) sədri Aydın Əliyev Kürdəmir şəhərindəki Heydər Əliyev Mərkəzində Kürdəmir, Ucar, Zərdab, Göyçay rayonlarında yaşayan vətəndaşları qəbul edib, onların müraciətlərini dinləyib. Bu barədə "Report"a DGK-nın mətbuat xidmətindən məlumat verilib.

Komitənin müvafiq struktur rəhbərlərinin də iştirak etdikləri qəbulda sakinlərin müraciətləri əsasən işə qəbul, malların idxal və ixracı, bununla əlaqədar sənədləşmə qaydaları və gömrük-keçid məntəqələrində vəziyyət barədə olub.

DGK sədri qaldırılan məsələlərin qanunvericiliyə uyğun həll edilməsi barədə müvafiq strukturların rəhbərlərinə tapşırıqlarını verib.

Vətəndaşların qəbul zamanı qaldırdıqları məsələlərin bir qismi yerindəcə həllini tapıb. Komitənin səlahiyyətlərinə aid olmayan məsələlərlə bağlı müraciətlər isə müvafiq orqanlara çatdırılmaq üçün qeydiyyata alınıb və nəzarətə götürülüb.