Daşınmaz əmlak bazarında son vəziyyət: Qiymətlər rayonlar üzrə necə dəyişib?

Bu ilin yanvar ayında Bakının daşınmaz əmlak bazarında qiymətlər müvafiq olaraq 2022-ci ilin dekabr ayı ilə müqayisədə 2 %, illik nisbətdə isə 18,83 % artıb.

Bunu "Report"a “Vecon Consulting” şirkətinin təsisçisi, iqtisadçı ekspert Vüqar Oruc bildirib.

“Təkrar mənzil bazarında yeni tikililərdə mənzillərin (1 kvadrat metrə görə) qiymətində ay ərzində 2 % artım, il ərzində 20,3 % artım, köhnə tikililərdə mənzillərin qiymətində (1 kvadrat metrə görə) ay ərzində 1,3 %, il ərzində 18 % artım qeydə alınıb. Bazarda təklif portfelinin həcmi ay ərzində 5,43 %, il ərzində 22,6 % yüksəlib.

İlkin mənzil bazarında qiymətlərdə (1 kvadrat metrə görə) ötən ayla müqayisədə 1,9 %, il ərzində 23,6 % artım müşahidə edilib. Bazarda təklif sayı ay ərzində 2,7 %, il ərzində isə 36,3 % artıb", - V. Oruc qeyd edib.

Önun sözlərinə görə, mənzillərin kirayəsi bazarında qiymətlərdə (1 kvadrat metrə görə) ay ərzində 4,2 % azalma, 2022-ci ilin müvafiq dövrü ilə müqayisədə isə 21,2 % artım qeydə alınıb: "Mənzillərin kirayəsi üzrə təklif sayı ay ərzində 4,7 %, il ərzində isə 38,4 % artıb”.

Ay ərzində Bakının Nəsimi rayonunda köhnə tikililərdə mənzillərin qiymətində 1,2 %, yeni tikililərdə isə 1,8 % artım olub, Nizami rayonunda qiymətlər müvafiq olaraq 1 % və 1,6 %, Qaradağ rayonunda 0,5 % və 0,9 %, Sabunçu rayonunda 0,8 % və 1,1 %, Səbail rayonunda 1,2 % və 1,5 %, Suraxanı rayonunda 0,4 % və 0,6 %, Xətai rayonunda 1,7 % və 3,1 %, Yasamal rayonunda 2 % və 2,8 %, Binəqədi rayonunda 0,9 % və 1,5 % və Nərimanov rayonunda 2,8 % və 4,6 % yüksəlib.