Qazaxıstanlı nazir müavini: "Azərbaycan ilə ticarət dövriyyəsi şaxələndiriləcək" - EKSKLÜZİV

Qazaxıstan və Azərbaycan arasında ticarət dövriyyəsi şaxələndiriləcək.

Bunu "Report"a açıqlamasında Qazaxıstanın ticarət və inteqrasiya nazirinin müavini Ayjan Bijanova deyib.

Onun sözlərinə görə, iki ölkə arasında ticarət strukturunun dəyişdirilməsi vacibdir:

"Əsas məqsədimiz ticarəti diversifikasiya etməkdir. Xammal deyil, yüksək əlavə dəyərə malik məhsullar üstünlük təşkil etməlidir. Bu həm ÜDM-ə töhfə verəcək, həm də yeni nəsil istehsalçıların yetişməsinə imkan yaradacaq".

Nazir müavini əlavə edib ki, iki ölkənin məhsullarının qarşılıqlı tanıdılması vacibdir:

"Azərbaycanda istehsal olunan məhsullar Qazaxıstan bazarına, Qazaxıstan məhsulları isə Azərbaycan bazarına çıxarılacaq. İstehlakçılar bir-birinin məhsullarını tanımalı və alış-veriş etməlidirlər. Bunun üçün pərakəndə şəbəkələrdə pilot layihələrə başlayırıq".