Azərbaycanda "E-Agro" sistemi ilə çıxarışlaşma 75 %-i keçib

Azərbaycanda Elektron Kənd Təsərrüfatı İnformasiya Sistemində ("E-Agro") çıxarışlaşma 75 %-i ötüb.

"Report" xəbər verir ki, bunu kənd təsərrüfatı nazirinin müavini İlhamə Qədimova Milli Məclisin Aqrar siyasət komitəsinin bu gün keçirilən iclasında - "Məhsul şəhadətnaməsi haqqında" qanun layihəsinin müzakirəsində bildirib.

Onun sözlərinə görə, fermerlərin sənədləşmə ilə bağlı problemləri hər zaman nazirliyin gündəmindədir: "Elektron Kənd Təsərrüfatı İnformasiya Sistemində hazırda çıxarışlaşma prosesi həyata keçirilir. Bununla fermer bizə müraciət edərkən heç bir sənəd təqdim etmir. Yəni fermer şəxsiyyət vəsiqəsindəki FİN-i ilə sistemə daxil olur və əkdiyi məhsulları bəyan edir. Çünki bizi maraqlandıran əsas məsələ budur. Bu prosesə başladığımız zaman çıxarışlaşma 25 %-i belə ötmürdü". Bu göstərici bu gün 75 %-i keçib. Bu, 4-5 il ərzində əldə etdiyimiz uğurdur və hazırda hədəfimiz bunu 100 %-ə çatdırmaqdır".